Министерот за здравство Азир Алиу ги поздрави учесниците на синдикалната школа организирана од Самостојниот синдикат на вработените во универзитетските клиники, клинички болници и други јавни здравствени установи во Македонија, истакнувајќи ја важноста на синдикатите како искрен партнер во градењето на подобар здравствен систем.
– Темата „Синдикализам во здравството: правата не се даваат – се освојуваат“ е инспиративна и ја реафирмирам нашата заложба за зајакната соработка. Мојот кабинет е секогаш отворен за сугестии и идеи, бидејќи заедно сме уште подобри, истакна Алиу.
Во соопштението од Министерството се нагласува дека во рекордно време се реализирани над 1.250 вработувања, вклучително и процесот за вработување приватни специјализанти, со што е решен долгогодишниот егзистенцијален проблем на оваа категорија здравствени работници.
Министерството за здравство ја потврдува својата посветеност кон достоинството на медицинските лица и останува отворено за натамошна соработка со синдикатот, со цел заеднички да се решаваат сите предизвици и да се излезе во пресрет на здравствените работници и пациентите.
