Метеопрогнозерот Славчо Попоски најавува сериозна промена на времето во Македонија во текот на сабота, 16 мај 2026 година, кога земјата ќе биде зафатена од циклонска активност која доаѓа од подрачјето на Џенова.
Според прогнозите, времето ќе биде променливо облачно и многу нестабилно, проследено со чести врнежи од дожд, грмежи и засилен ветер кој ќе дува од јужен и југозападен правец. На повеќе места се очекува временските процеси дополнително да се интензивираат, па можно е да се развијат и локални невремиња.
Во одредени делови од државата се очекуваат обилни поројни врнежи, при што за краток временски период може да наврнат над 30 литри дожд на метар квадратен. Покрај тоа, можно е невремето да биде проследено со силни налети на ветер кои би можеле да надминат брзина од 70 километри на час, како и со силни електрични празнења и појава на град.
Нестабилното време нема да го одмине ниту Скопје. Во главниот град и околината во текот на саботата се очекуваат чести врнежи од дожд, грмежи и засилен ветер. Во одредени делови од скопската котлина постојат услови за развој на невреме со интензивен пороен дожд, силен ветер, електрични празнења и можност за појава на град.
Што се однесува до температурите, утринските ќе се движат од 7 до 14 степени, додека дневните ќе достигнуваат од 17 до 23 степени. Во Скопје температурата наутро ќе се спушти до околу 11 степени, а преку ден ќе достигне околу 22 степени.
Од метеоролозите доаѓа и апел до граѓаните за зголемена внимателност во случај на појава на посилно невреме. Се препорачува да не се престојува на отворен простор за време на силни електрични празнења, особено не под осамени дрвја. Исто така, поради можните силни налети на ветер, се советува автомобилите да не се паркираат во близина на стари и високи дрвја кои би можеле да претставуваат опасност.
