Регулаторната комисија за енергетика донесе нова одлука за цените на нафтените деривати, со која од полноќ следува поевтинување на дизелот, но и значително поскапување на бензините.
Новите максимални малопродажни цени ќе важат од 15 септември 2026 година, од 00:01 часот.
ЕУРОСУПЕР БС-95 поскапува за 3,50 денари и ќе се продава по максимална цена од 100,50 денари за литар, додека ЕУРОСУПЕР БС-98 исто така поскапува за 3,50 денари и ќе чини 102,50 денари за литар.
За разлика од бензините, ЕУРОДИЗЕЛ поевтинува за два денари и неговата нова цена ќе изнесува 99 денари за литар.
Екстра лесното масло за домаќинство поскапува за 4,50 денари и ќе чини 109,50 денари за литар, додека мазутот поскапува за 2,242 денари и новата цена ќе биде 48,243 денари за килограм.
Во просек, малопродажните цени на нафтените деривати се зголемуваат за 2,86 проценти во однос на одлуката од 7 септември.
Пониската цена на дизелот доаѓа во услови на привремено намалување на ДДВ-то за ова гориво од 18 на 10 проценти, мерка предвидена да важи две недели. Според објавените пресметки, без намалениот ДДВ и претходното намалување на акцизата, цената на дизелот би била за околу 11 денари повисока.
