Истрагата против 25-годишниот Т.Б. од селото Малотино, општина Старо Нагоричане, добива нов и уште позагрижувачки тек, откако надлежните институции откриле дополнителни четири кривични дела за кои постои сомнение дека се поврзани со него.
Според најновите информации од истрагата, осомничениот, кој во јавноста веќе се споменува како првиот сериски убиец на жени во земјава, сега се сомничи за уште две убиства и два обиди за убиство. Истражните органи продолжуваат интензивно да работат на прибирање докази и утврдување на сите околности поврзани со случаите.
Обвинителот Љубомир Лапе на денешниот брифинг истакна дека станува збор за исклучително специфичен и тежок случај, каков што досега не бил забележан во домашната судска практика.
„Станува збор за прв случај на сериски убиец со елементи на фемицид, бидејќи сите жртви биле жени и нападите биле насочени кон нив токму поради полот“, изјави обвинителот Лапе.
Досегашните информации од полицијата и обвинителството укажуваат дека осомничениот подолг период бил предмет на интерес на истражните органи, а со новите сознанија случајот добива уште посериозна димензија.
Истрагата во моментов е насочена кон целосно поврзување на сите случаи во кои жртви биле жени, како и кон утврдување дали постојат и други нерешени напади кои евентуално би можеле да се поврзат со осомничениот.
Случајот предизвика огромно внимание и вознемиреност во јавноста, особено поради тежината на обвиненијата и фактот што, според обвинителството, се работи за прв ваков регистриран случај во Македонија со елементи на сериски фемицид.
