Граѓаните повторно ќе имаат можност да вложат средства во државни обврзници со годишна каматна стапка од 4,6 проценти. Министерството за финансии го објави проспектот за четвртата емисија на граѓански обврзници, со која заинтересираните ќе можат да инвестираат почнувајќи од минимален износ од 10.000 денари.
Со новата емисија, државата планира да собере вкупно 100 милиони денари, сума што одговара на околу 1,6 милиони евра. Обврзниците ќе бидат издадени во денари, без девизна клаузула, а аукцијата е закажана за 3 декември, од 9 до 13 часот.
Заинтересираните граѓани ќе можат да поднесат барања за учество преку овластените банки, најдоцна до 1 декември. Банките ќе посредуваат во процесот на учество на аукцијата, па потенцијалните инвеститори треба навреме да се информираат за условите, роковите за поднесување на барањата и уплатата на средствата.
Со оваа четврта емисија, граѓаните повторно добиваат можност своите средства да ги вложат во државни обврзници со утврден каматен принос, согласно условите наведени во проспектот.



