Две лица се пријавени како жртви на физички напад што се случил ноќва на булеварот „Октомвриска револуција“ во Куманово, каде биле нападнати од група повеќе лица кои, според пријавата, користеле и тврди предмети.
Според информациите од СВР Куманово, случајот бил пријавен на 17.05.2026 година во 02:00 часот од страна на 21-годишниот Д.М. од Куманово. Тој пријавил дека заедно со својот пријател Д.Т. биле физички нападнати додека се наоѓале на булеварот.
Во пријавата се наведува дека повеќе лица учествувале во нападот, при што биле употребени и предмети со кои им биле нанесени удари на оштетените.
Од полицијата информираат дека се преземаат мерки за целосно расчистување на случајот, идентификација на напаѓачите и утврдување на околностите под кои дошло до инцидентот.
