Заменик министерот за образование, Лулзим Алиу, денеска преку социјалните мрежи објави дека поднел неотповиклива оставка од функцијата.
Алиу оставката ја доставил до претседателот на Владата, Христијан Мицкоски, истовремено споделувајќи ја и на својот Фејсбук профил.
Во соопштението, тој објаснува дека одлуката е резултат на лична и професионална анализа, нагласувајќи дека во овој период е најсоодветно да го продолжи својот придонес во акдемското поле, истражувачко-научната работа, како и посветеноста кон семејството:
„Почитуван Претседател на Владата, Со ова писмо сакам да Ве известам дека поднесувам неотповиклива оставка од функцијата заменик министер во Министерството за образование и наука на Република Северна Македонија. Мојата оставка доаѓа како одраз на моја лична и професионална анализа, ценејќи дека во овој период е најсоодветно да го продолжам својот придонес во академското поле, во мојата истражувачко-научна работа, како и посветеност кон семејството.“
Алиу упати благодарност до Владата за довербата и можноста да ја извршува оваа одговорна функција, посакувајќи им понатамошни успеси.
Лулзим Алиу е кадар на коалицијата ВРЕДИ, односно партијата Алтернатива, и изрази благодарност и до партијата и нејзиниот актуелен претседател Беким Али, како и претходните лидери Африм Гаши и Зеќирија Ибрахими.
