Традиционалната манифестација „Богојавление – Водици“ годинава се одржа на Мало Мовче во Велес, каде што Митрополитот Повардарски Господин Агатангел ги освети водите на Вардар и положи Чесниот крст.
По завршувањето на литургијата во црквата „Свети Спас“, верниците и свештениците се упатија во Литија до центарот на Велес, каде што се одвиваше главниот дел на манифестацијата.
Со годинишниот чин на вадење на крстот се истакна Стојанче Илчевски од месноста Варналиите, кој го извади Чесниот крст од осветените води на Вардар, добивајќи благослов за претстојната година.
На настанот присуствуваа и бројни јавни личности, меѓу кои министерот за култура Зоран Љутков, градоначалникот Марко Колев, пратениците Игор Здравковски и Александар Јамалов, како и претседателот на Совет на Општина Велес, Даниел Јаневски, кој годинава беше кум на манифестацијата, заедно со раководители на повеќе локални институции.
Настанот беше проследен со голема радост и верска посветеност, а присутните верници ја почувствуваа духовната важност на празникот во духот на вековната православна традиција.
