Градоначалникот на Скопје, Орце Ѓорѓиевски, вечерва ја соопшти новата кадровска поставеност во четирите клучни јавни претпријатија во градот. Сите институции добиваат нови вршители на должноста директори.
Во ЈП „Улици и патишта“ за директор ќе биде назначен Борис Настов, кој оваа функција ја извршуваше и во првиот дел од мандатот на поранешната градоначалничка Данела Арсовска.
Во „Водовод и канализација“ нов в.д. директор ќе биде Иван Митровски, досегашен заменик-градоначалник на општина Кисела Вода.
За ЈСП Скопје, Ѓорѓиевски најави назначување на човек кој долги години работи во претпријатието и ги познава сите процеси – тоа е Саше Илиевски, кој, според градоначалникот, има искуство и кредибилитет за да ја води институцијата.
Во „Комунална хигиена“ директор ќе биде лице кое има долгогодишно искуство во комуналниот сектор на Град Скопје и кое, како што истакна градоначалникот, се покажало исклучително успешно за време на акцијата „72 часа“. Новиот директор се вика Драги, и не бил експониран ниту политички, ниту во јавноста.
Ѓорѓиевски ги демантираше тврдењата дека планира приватизација на јавните претпријатија, нагласувајќи дека ќе работи на зајакнување на нивната функционалност и самоодржливост.
Тој додаде и дека сметките за граѓаните нема да поскапат, бидејќи тоа било едно од неговите јавно дадени ветувања во кампањата.
