Управа за финансиска полиција поднесе кривична пријава против три физички лица и едно правно лице поради сомнение за даночно затајување поврзано со продажба на производствена линија за кабли вредна 236.000 евра.
Според информациите од Финансиската полиција, постојат сомненија дека трансакцијата била реализирана, но приходот од продажбата не бил внесен во деловната и сметководствената документација на компанијата. Со тоа, според пријавата, државниот буџет бил оштетен за околу 4.677.362 денари, односно приближно 76.000 евра по основ на непријавени даночни обврски.
Како што соопшти институцијата, првопријавениот Д.П., во својство на управител на фирмата, заедно со второпријавениот Г.З., сопственик и овластен потписник на банкарската сметка, како и третопријавениот И.Ѓ., поранешен сопственик на правното лице, во април 2024 година договориле и реализирале продажба на производствена линија за кабли.
Вредноста на продажбата изнесувала 14.514.000 денари, односно околу 236.000 евра, но според сомнежите на надлежните, трансакцијата не била евидентирана во официјалните деловни книги на компанијата.
Пари завршиле на лични сметки, се проверуваат и други трансакции
Во рамките на истрагата било утврдено сомнение дека дел од средствата од продажбата, во износ од 2.701.189 денари или околу 43.900 евра, биле префрлени на лични банкарски сметки и сметки на блиски лица, без тие средства да бидат прикажани во сметководствената евиденција на фирмата.
Дополнително, дел од договорената продажба, според пријавата, бил извршен преку компензација – со патничко возило проценето на 1.537.500 денари (околу 25.000 евра) и кабли во вредност од 1.516.500 денари (околу 24.600 евра).
Финансиската полиција наведува дека ниту возилото, ниту каблите не биле евидентирани во деловните книги на компанијата, а при контролата не биле пронајдени ниту кај правното лице.
Сомнежи и за непријавени обврски од над 17 милиони денари
Во пријавата се наведува и дека управителот, во име и за сметка на компанијата, не ги отпишал и не ги оданочил неплатените обврски кон домашни и странски добавувачи кои датираат од 2022 година.
Вредноста на овие обврски, според Финансиската полиција, изнесувала 17.380.716 денари, односно околу 282.600 евра.
Според наводите, со ваквите дејствија не биле пресметани, пријавени и уплатени повеќе даночни обврски, меѓу кои:
- 272.970 денари (околу 4.400 евра) данок на додадена вредност (ДДВ);
- 3.764.991 денар (околу 61.200 евра) данок на добивка;
- 639.401 денар (околу 10.400 евра) данок на личен доход.
За случајот понатаму ќе постапува Основното јавно обвинителство Скопје, кое треба да ги утврди сите околности и евентуалната одговорност на пријавените лица.
Според податоците на Управата за финансиска полиција, од почетокот на годинава до сега биле поднесени 44 кривични пријави и пет иницијативи. Во овие предмети е евидентирана вкупна штета и противправно стекната имотна корист од 3.348.111.140 денари, односно околу 54,4 милиони евра.
Во истиот период, вредноста на замрзнатиот имот поврзан со истрагите изнесува 38.111.256 денари, односно околу 619.700 евра.
