Обвинителката Ленче Ристоска денеска ја поднесе оставката на функцијата Јавен обвинител до архивата на Советот на јавни обвинители.
Причина за оставката, како што објасни Ристоска, е одземањето на предметите за висока корупција „Талир 1“ и „Талир 2“, поврзани со ВМРО-ДПМНЕ.
„Последните одлуки на Советот на јавни обвинители и на новиот Државен јавен обвинител многу се штети на позицијата на Јавното обвинителство и се спротивни на сите принципи за кои се борам. Одземањето на предметите беше кулминација. Веднаш кажав дека таквото однесување е неприфатливо и за мене значи оставка“, изјави Ристоска.
Таа нагласи дека промена на обвинителот на предметот „Талир 2“ ќе доведе до враќање на судењето од почеток и најверојатно до застарување на предметот.
Ристоска беше под силен јавен притисок и мобинг од Советот на јавни обвинители, како и од ВМРО-ДПМНЕ, а во изминативе години застапуваше обвиненија за висока корупција кои директно се однесуваат на финансиските активности на претходното раководство на партијата.
Обвинителката додаде дека сега ќе ја раскаже својата приказна на јавноста и размислува како да продолжи професионално, верувајќи дека однадвор ќе може да даде поголем придонес отколку од внатре.
