Премиерот на Република Северна Македонија, Христијан Мицкоски, одговарајќи на новинарско прашање поврзано со пензиите и нивниот понатамошен раст, порача дека Владата ќе продолжи да работи во интерес на пензионерите, потсетувајќи на досегашните мерки што беа преземени.
Тој истакна дека уште додека биле во опозиција ветиле дека ќе направат сè што е во нивна моќ за во текот на мандатот да обезбедат линеарно зголемување на пензиите од 5.000 денари за сите пензионери. Според него, наместо тоа ветување, Владата успеала да реализира уште поголемо зголемување, односно линеарно покачување од 7.000 денари за секој пензионер.
Мицкоски посочи дека ова решение било оспорувано пред Уставниот суд преку иницијативи поднесени од лица кои, како што рече, биле блиски до тогашната владејачка СДСМ и сегашната опозиција. Според него, во јавноста биле изнесувани аргументи со кои се доведувала во прашање уставноста на ваквиот начин на зголемување на пензиите.
Тој нагласи дека, и покрај тие реакции, најважен е ефектот што мерката го има врз животниот стандард на пензионерите. Како пример наведе дека во домаќинство во кое двајца членови се пензионери, со линеарното покачување семејниот буџет се зголемува за вкупно 14.000 денари, што, според него, претставува значајна финансиска помош и придонесува за подостоинствен живот.
Премиерот додаде дека Владата и во иднина ќе продолжи да носи политики насочени кон подобрување на условите за живот на граѓаните, особено на пензионерите. Тој потсети дека во минатото пензиите се зголемувале за симболични износи од по десетина или дваесетина денари, додека сегашното линеарно зголемување од 7.000 денари, според него, претставува значително поголема поддршка.
Во својата изјава Мицкоски не најави конкретен нов износ или датум за дополнително покачување на пензиите, но порача дека Владата ќе продолжи да работи на мерки кои ќе бидат во интерес на пензионерите и ќе помогнат во справувањето со предизвиците со кои тие секојдневно се соочуваат.
