Македонија и Бугарија го потпишаа Договорот за подготовка, изградба и оперативност на меѓуграничниот железнички тунел на Коридор 8, на церемонија одржана во Ѓуешево.
Претседателот на Европскиот совет, Антонио Кошта, го поздрави потпишувањето како голем чекор во билатералната соработка, кој ќе го поттикне регионалниот развој и ќе ја зајакне заедничката безбедност. Еврокомесарката Марта Кос истакна дека проектот ги поврзува Јадранското и Црното Море, создавајќи нови можности за соработка и економски просперитет.
Договорот го потпишаа заменик-претседателите на Владите за транспорт од двете земји, Александар Николовски и Гроздан Караџов. Европската комисија ќе обезбеди финансиска поддршка за проектот, кој е дел од трансевропската железничка мрежа.
Изградбата на тунелот се очекува да го зголеми товарниот превоз за над 30%, а патничкиот сообраќај за 20–25%, придонесувајќи за посилен регионален транспорт, економија и безбедност.
