Министерството за внатрешни работи започна внатрешна истрага против инспектор од Тетово, откако неговиот син беше фатен со околу 100 грама кокаин, дигитална вага и пари – сето тоа пронајдено во патничко возило во кое се наоѓал заедно со уште едно лице.
Според информациите потврдени од МВР за Порталб.мк, станува збор за син на инспекторот за борба против дрога, Орце Смилевски, вработен во СВР Тетово. Иако не се наведува дали дрогата е пронајдена во неговото службено или приватно возило, Министерството не ја демантира таа можност, но засега не открива детали.
„Одделот за внатрешна контрола, криминалистички истраги и професионални стандарди при МВР презема соодветни мерки и активности во врска со конкретниот случај, по што соодветно ќе ја известиме јавноста“, изјавија од МВР.
Инцидентот се случил на 4 октомври 2025 година, во 02:05 часот по полноќ, кога полициски службеници од Полициската станица за безбедност на патниот сообраќај Тетово ги привеле И.С. (23) и Н.С. (28), двајцата од село Брвеница, поради сомнителна содржина во нивното возило.
При детална проверка на возилото марка БМВ со тетовски регистарски таблички, кое го управувал И.С., полицијата пронашла бела прашкаста материја за која постои сомнеж дека е кокаин, дигитална вага и поголема количина пари.
Против двајцата осомничени е поднесена кривична пријава за неовластено производство и пуштање во промет на наркотични дроги, психотропни супстанции и прекурсори. Основното јавно обвинителство Тетово побара мерка притвор за еден од осомничените, а за вториот – мерка на претпазливост.
МВР засега не потврдува дали возилото во кое биле пронајдени наркотиците е во сопственост на инспекторот Смилевски, ниту дали тој бил информиран или вмешан на кој било начин. Истрагата, како што велат од Одделот за внатрешна контрола, е во тек.
