Поради најавениот пад на температурите, од утре, 13 октомври, започнува испораката на топлинска енергија за корисниците во Скопје приклучени на системите со кои управува АД ЕСМ.
Иако официјалниот почеток на грејната сезона е предвиден за 15 октомври, законските прописи дозволуваат греењето да започне порано доколку прогнозирана средна дневна температура изнесува 12 степени или помалку.
Според податоците на Управата за хидрометеоролошки работи, за вторник се очекува средна дневна температура од 12 степени, со што се исполнети условите за предвремено вклучување на парното.
Од ЕСМ информираат дека интензитетот на греењето ќе се приспособува на временските услови.
Во текот на октомври и првата половина од ноември, при повисоки надворешни температури испораката може да биде намалена или привремено прекината, додека при заладување повторно ќе се активира.
Компанијата апелира до граѓаните навремено да ги завршат сите интервенции на внатрешните инсталации за греење.
Заедниците на сопственици треба да обезбедат пристап до топлинските потстаници, редовно електрично напојување и подмирени сметки за струја во заедничките простории.
До 15 октомври, АД ЕСМ секојдневно ќе објавува информации за режимот на испорака.
За дополнителни информации граѓаните можат да се обратат на телефонските броеви 02 3076 200 и 075 400 100 за ЕСМ Снабдување, како и 02 3104 816 и 02 3104 872 за ЕСМ Енергетика.
