Сериозен пожар избувна синоќа во менза на фирма во скопско Визбегово, при што сопственикот на компанијата заврши во болница поради вдишување чад.
Според информациите од полицијата, огнот избувнал околу 22:10 часот во објект во село Визбегово. Сопственикот, 44-годишниот Ж.В. од Скопје, прв го забележал пожарот и веднаш се обидел сам да го изгасне за да спречи поголема материјална штета.
Иако успеал да го стави огнот под контрола, за време на интервенцијата вдишал значителна количина чад и бил принуден да побара медицинска помош. Тој е хоспитализиран на Комплексот клиники „Мајка Тереза“, каде му е укажана соодветна нега.
Случајот бил пријавен во полиција околу 23:50 часот. Причините за пожарот сè уште се истражуваат.
