Денеска се одбележуваат 11 години од една од најтрагичните и најтешки безбедносни кризи во поновата македонска историја – вооружената престрелка во кумановската населба „Диво насеље“, која на 9 и 10 мај 2015 година ја потресе целата држава и остави длабока болка кај граѓаните.
Во дводневните жестоки судири меѓу македонските безбедносни сили и вооружената група, животот го загубија осуммина припадници на специјалната полициска единица „Тигар“, кои останаа запаметени како херои што застанаа во одбрана на државата, безбедноста и мирот. Во акцијата беа убиени и 14 припадници на вооружената група, а најмалку 40 лица беа повредени.
По повод годишнината, министерот за внатрешни работи Панче Тошковски положи свежо цвеќе пред споменикот на загинатите полициски службеници во кругот на СВР Куманово, оддавајќи почит кон осумтемина припадници на полицијата – Љубиша Аранѓеловиќ, Бобан Ивановиќ, Горан Илијевски, Жарко Кузмановски, Исамедин Османи, Сашо Самојловски, Ненад Серафимоски и Горан Стојменовиќ.
Во своето обраќање, Тошковски истакна дека тие се симбол на чест, достоинство и непоколеблива храброст, луѓе кои во најтешките моменти ја ставиле татковината пред сопствениот живот. Тој потенцираше дека нивната жртва никогаш не смее да биде заборавена и дека Македонија вечно ќе им остане благодарна.
Во рамки на денешното одбележување, министерот присуствуваше и на меморијалниот турнир во мал фудбал „Хероите живеат вечно“, организиран во нивна чест, како потсетник дека споменот за нив продолжува да живее.
Пораки за почит и сеќавање упатија и поранешниот министер за внатрешни работи Оливер Спасовски, поранешниот заменик-министер Митко Бојмацалиев, како и претставници на полицискиот синдикат.
Во нивните објави, тие потсетија на драматичните моменти кога Куманово се разбуди со звуци на експлозии, пукотници и страв, додека „Диво насеље“ беше претворено во воена зона. Заедничката порака беше дека осумтемина полицајци се вечни херои на Македонија, чии имиња остануваат засекогаш врежани во колективната меморија.
Полицискиот синдикат порача дека нивната саможртва е патоказ за идните генерации за тоа што значи вистинска љубов кон татковината, нагласувајќи дека тие загинале бранејќи го суверенитетот и територијалниот интегритет на државата.
И по 11 години, „Диво насеље“ останува болен потсетник за цената на безбедноста, но и симбол на храброста на оние кои без двоумење застанаа во одбрана на Македонија. Осумте имиња и нивната жртва остануваат вечен белег во најновата македонска историја.
