Управата за хидрометеоролошки работи (УХМР) за денеска најави нестабилно време со повремени локални врнежи од дожд, додека на планините врнежите ќе бидат од снег. Според прогнозите, пообилни врнежи се очекуваат во јужните делови на земјата, а во текот на ноќта и во западните региони.
Покрај временската прогноза, УХМР излезе и со хидро аларм, предупредувајќи на потенцијална опасност од излевање на реките. Според официјалната карта што ја објави Управата, со жолта боја е означена речиси половина од државата, при што под зголемено внимание се ставени јужните делови на Македонија.
Надлежните апелираат на внимателност, особено во подрачјата во близина на речните корита, каде поради зголемените врнежи може да дојде до пораст на водостојот и локални излевања.
За утре, од УХМР најавуваат променливо облачно време со повремени локални врнежи од дожд, додека на повисоките места се очекува мешавина од дожд и снег, а на планините претежно снег. Ќе дува слаб ветер од променлив правец.
Во Скопје се прогнозира променливо облачно време со повремен слаб дожд, без поголеми температурни осцилации.
Од УХМР најавуваат дека состојбата ќе се следи континуирано и доколку има промени, јавноста ќе биде навремено информирана.
