Судскиот процес поврзан со пожарот во дискотеката „Пулс“ во Кочани продолжи со разгледување на документација поврзана со инспекциските контроли што ги спроведувале општинските служби.
На денешното рочиште обвинителството презентираше извештаи од инспекциски надзори, овластувања за работа на градежни инспектори и други документи кои, според нив, се значајни за утврдување на надлежностите и постапувањето на институциите пред несреќата. Во доказниот материјал беа вклучени и решенија за ангажирање овластени инспектори.
Одбраната на дел од обвинетите изрази незадоволство од начинот на кој се доставени доказите. Адвокатот Димитар Дангов истакна дека голем дел од материјалите биле предадени во електронска форма, поради што, според него, е отежнато нивното следење и анализа.
Во текот на расправата, обвинителството посочи дека од извештаите за инспекциските контроли може да се забележи дека одредени забелешки не биле реализирани и покрај претходните укажувања. На ова реагираше одбраната, оценувајќи дека оценката на доказите е исклучиво задача на судот.
Дополнително, адвокатите се спротивставија на презентирање документи поврзани со кафуле кое, според нив, не е предмет на обвинението. Обвинителството, пак, нагласи дека тие материјали се релевантни бидејќи се однесуваат на истиот правен субјект.
Трагичниот пожар во дискотеката „Пулс“ се случи на 16 март 2025 година. Во несреќата животот го загубија 63 лица, додека повеќе од 200 беа повредени. Случајот предизвика големо внимание во јавноста и отвори дебата за безбедноста, контролите и почитувањето на законските прописи во угостителскиот сектор.
