Во пресрет на новогодишните и божиќните прослави, Дирекцијата за заштита и спасување (ДЗС) упати јасен и итен апел до сопствениците на угостителски објекти и организаторите на јавни и приватни настани, со цел да се спречат евентуални инциденти и да се обезбеди безбедноста на граѓаните.
Од ДЗС нагласуваат дека безбедносните протоколи мора строго да се почитуваат, особено во период кога се очекува зголемена посетеност во кафулиња, ресторани, дискотеки и други затворени простори.
Клучните обврски за локалите се:
- строго придржување до дозволениот максимален број на гости,
- сите евакуациски патишта мора да бидат проодни, јасно означени и без никакви пречки,
- излезните врати задолжително да бидат отклучени за време на настаните,
- противпожарните апарати да бидат исправни и лесно достапни,
- строго е забранета употреба на петарди, огномети и било каков отворен пламен во затворен простор.
Дополнително, од Дирекцијата потенцираат дека персоналот во објектите мора да биде обучен и подготвен за навремена реакција во случај на пожар или друга вонредна состојба.
„Почитувањето на мерките не е само законска, туку и морална обврска, бидејќи станува збор за заштита на човечки животи“, апелираат од ДЗС, најавувајќи и засилени контроли за време на празниците.
