Државната изборна комисија (ДИК) на денешната седница ги утврди новите тројца кандидати за пратеници, кои ќе ги заменат досегашните членови на парламентот – Бети Стаменковска-Трајковска, Јане Мицевски и Дејан Продановски, избрани за градоначалници на неодамнешните локални избори.
На нивно место ќе влезат Александра Николовска, Мартин Стојановски и Мито Андонов, кои, според редоследот на листата на коалицијата „Твоја Македонија“, ќе ги преземат пратеничките функции.
Претседателот на ДИК, Борис Кондарко, објасни дека:
- Александра Николовска и Мартин Стојановски ќе бидат пратеници во Изборната единица 1,
- а Мито Андонов во Изборната единица 4.
Дополнително, Стојановски ќе го замени Игор Николовски, кој ја известил Комисијата дека не го прифаќа мандатот.
ДИК ќе им издаде уверенија на новите пратеници, по што Собранието на Република Северна Македонија ќе ги верификува нивните мандати.
Претходно, Собранието официјално го констатираше престанокот на пратеничките мандати на Јане Мицевски, Бети Стаменковска-Трајковска и Дејан Продановски, кои од 19 октомври и 2 ноември ги извршуваат функциите градоначалници на Сопиште, Кисела Вода и Прилеп.
Овој процес претставува редовна постизборна процедура, со која се обезбедува континуитет во работата на Собранието и целосна претставеност на сите изборни единици.
