Кулата на Водно, која беше изградена во текот на 12 години, конечно е при крај и наскоро ќе биде отворена за посетители. Овој објект на Агенцијата за електронски комуникации не само што ќе служи за поставување на системи за мобилна телефонија и радио сигнал, туку ќе понуди и туристичка атракција со угостителски сервис.
Кулата има четири платформи со вкупна површина од 200 метри квадратни. Првата е наменета за опремата на војската и полицијата, втората за мобилните оператори, а третата за македонската радио дифузија, каде ќе бидат поставени антенски комплекси за дигитално радио – даб. Четвртата платформа е наменета за посетителите, со 14 маси на кои може да седат по 4 лица, вкупно 56 посетители. Таму ќе се служат пијалоци и ладни сендвичи, без готвење на храна.
Пристапот до кулата е пешачки, бидејќи патот од средно Водно до врвот не е предвиден за сообраќај со возила. Посетителите ќе можат да стигнат пеш или со жичара. Спортските рекреативци изразија загриженост дека можниот метеж би можел да го наруши нивното слободно движење, но засега не постојат планови за отворање на патот за автомобили.
Кулата се смета за средно висока во Европа со 155 метри, а во Македонија е највисоката градба. Изградбата чинеше 18 милиони евра и беше одложувана повеќе пати, што ја направи една од најдолготрајните инфраструктурни инвестиции во земјата.
Орце Симов, претседател на комисијата за електронска комуникација, истакна дека остануваат уште неколку технички работи, како поставување на резервоар за нафта, осветлување и приклучок на електрична енергија, пред кулата да биде целосно отворена за јавноста.
Видео:
