Британскиот принц Хари ќе пристигне во Обединетото Кралство на 8 септември, на третата годишнина од смртта на неговата баба, кралицата Елизабета Втора. Тој ќе присуствува на церемонијата на доделување награди на добротворната организација „Велчајлд“.
Хари живее во Калифорнија откако се повлече од кралското семејство во 2020 година, но ќе се врати во својата татковина по повод 20-годишнината од овие награди, кои ги покровителува веќе 17 години. На настанот ќе се сретне со тешко болни деца и нивните семејства, а ќе додели и награда за „инспиративно дете“.
„Се чувствувам привилегиран што можам да присуствувам на наградите ‘Велчајлд’“, изјави принцот.
Враќањето на Хари во Велика Британија неизбежно ќе ги разгоре шпекулациите за помирување со кралското семејство, пишува агенцијата Франс Прес. Во мај годинава, тој во интервју за Би-би-си изјави дека сака да се помири со својот татко, кралот Чарлс III. Истиот месец, Хари беше последен пат виден во Велика Британија при судско рочиште.
Весникот „Мејл он Сандеј“ во јули објави фотографии од состанок меѓу кралот и советниците на Хари, што беше оценето како прв чекор кон помирување.
Кралицата Елизабета Втора почина на 8 септември 2022 година во нејзината шкотска резиденција Балморал. Принцовите Вилијам и Хари последен пат беа видени заедно неколку дена подоцна во замокот Виндзор.
Расколот меѓу Хари и кралското семејство се продлабочи на почетокот на 2023 година, кога принцот објави мемоари во кои остро критикуваше дел од членовите на семејството, вклучувајќи го и својот брат и принцезата Кејт.
