Кина и Русија го осудија потегот на Германија, Франција и Велика Британија за активирање на механизмот за повторно воведување на санкции против Иран, оценувајќи го како „контрапродуктивен“ и предупредувајќи на „непоправливи последици“.
Берлин, Лондон и Париз започнаа процедура во ОН која може да доведе до повторно стапување на сила на старите санкции, вклучувајќи ембарго за оружје и мерки против ирански поединци и организации, поради наводно кршење на нуклеарниот договор од 2015 година.
Кинескиот портпарол Гуо Џиакун истакна дека ваквиот потег „не е конструктивен“ и дека треба да се поттикне дијалог и преговори, наместо конфронтација. Русија, пак, предупреди на „непоправливи последици“ ако санкциите се воведат.
Иранскиот парламент веќе најави закон за повлекување од Договорот за неширење на нуклеарно оружје, тврдејќи дека со враќањето на санкциите понатамошните преговори со Западот „немаат смисла“. Аналитичарите веруваат дека ова најмногу служи за внатрешна пропаганда.
