Во Куманово повторно е регистриран нов случај на затруено дете, што повторно ја отвора темата за безбедноста во домовите и достапноста на лекови до малолетници. Станува збор за четиригодишно дете кое, според првичните информации, испило поголема количина таблети додека било во домот.
По инцидентот, родителите веднаш побарале медицинска помош и детето било пренесено во Ургентниот центар во Куманово, каде што лекарите интервенирале за стабилизирање на неговата состојба. Поради сериозноста на ситуацијата, детето било итно транспортирано на Клиника во Скопје каде продолжува да биде под лекарски надзор.
Од СВР Куманово потврдуваат дека случајот е пријавен ноќеска околу 04:05 часот и нагласуваат дека се преземаат сите мерки за откривање на околностите под кои дошло до инцидентот.
Во тек се дополнителни проверки и разговори со родителите и медицинскиот персонал со цел да се утврди дали станува збор за несреќен случај, невнимание или друг тип на пропуст.
Случајот потсетува на важноста од правилно складирање на медикаменти и внимателност во домот, особено кога има мали деца.
