Новата книга за Дајана открива шокантни детали: лаги, фалсификати и манипулации што ја промениле судбината на принцезата
Новите откритија околу едно од најпознатите интервјуа во историјата – она на принцезата Дајана за Би-Би-Си во 1995 година – повторно ја разгоруваат расправата за тоа колку навистина била манипулирана и под притисок британската принцеза. Книгата на новинарот Енди Веб, „Дијанарама: Предавството на принцезата Дајана“, открива досега невидени детали, документи и сведоштва кои го менуваат целото разбирање на овој медиумски настан.
Интервјуто, кое во тоа време го гледале повеќе од 23 милиони луѓе, се сметаше за најхрабриот чекор на Дајана – ден кога јавно проговори за своите брачни маки, изолацијата во дворецот и скандалите што ја следеа. Но книгата на Веб тврди дека целиот процес зад камерите бил далеку помрачен и далеку поопасен отколку што јавноста знаела.
Лаги и измами што ја турнале Дајана во емоционален хаос
Мартин Башир, тогашниот новинар на Би-Би-Си, користел фалсификувани документи, лажни тврдења и психологиски притисок за да ја убеди Дајана дека најблиските луѓе ја предаваат. Според книгата, Башир ѝ подметнал низа измислени приказни:
– дека принцот Едвард имал СИДА – дека нејзиниот син Вилијам ја шпионира со таен уред – дека кралицата ќе абдицира за неколку месеци – дека дадилката Тиги Леџ-Бурк има интимна врска со Чарлс
Токму последното ја натерало Дајана да ја изговори легендарната реченица „во овој брак бевме тројца“ – но според книгата, таа реченица првично не се однесувала на Камила, како што целиот свет мислеше.
Документи кои исчезнале и предупредување за „наместена несреќа“
Најшокантниот дел од книгата е сведоштвото дека Дајана, неколку дена пред интервјуто, побарала од својот адвокат да состави меморандум во кој изразува сомнеж дека можеби ќе биде повредена во „инсценирана сообраќајна несреќа“. Овој документ, кој со години бил чуван во тајност, повторно го отвора прашањето дали Дајана стравувала од заговор против неа.
Дополнително, дел од интерните материјали на Би-Би-Си поврзани со снимањето – „мистериозно исчезнале“, што создава уште поголеми сомнежи околу улогата на медиумската куќа во целиот скандал.
Погубните последици за Дајана
Енди Веб тврди дека ова интервју го променило животот на Дајана – и тоа на полошо. Манипулациите ја изолирале, ја натерале да се оддалечи од кралското семејство, а многумина сметаат дека тоа ја турнало во еден потежок, ранлив период кој на крај, индиректно, довел до трагедијата во Париз.
Авторот наведува дека прикривањето на вистината од страна на Би-Би-Си и јавните институции било толку масивно што денес изгледа како „прикривање во рамки на прикривање“.
Книга што ќе ја разниша историјата на британската монархија
„Дијанарама“ предизвика огромно внимание не само поради шокантните сведоштва, туку и поради фактот дека темата е чувствителна и болна – Дајана беше и останува најомилената британска принцеза, а секој нов документ што ја допира нејзината смрт ја буди јавноста.
Книгата нуди нов, поостар поглед: дека Дајана не била само жртва на медиумите, туку и на оркестрирани лаги, психолошка манипулација и длабоко корумпиран систем кој ја искористил до последен здив.
