Кога станува збор за здравјето на срцето, најчесто се зборува за крвниот притисок, холестеролот и физичката активност. Сепак, кардиолозите предупредуваат дека и недостатокот на одредени витамини може да има значајно влијание врз работата на срцето и крвните садови.
Според кардиологот д-р Дибаншу Гупта, витамините Д, Б12, Б9 (фолна киселина), Ц и Б1 (тиамин) учествуваат во создавањето енергија, формирањето на црвените крвни зрнца, одржувањето на нормалната циркулација и правилниот срцев ритам. Нивниот долготраен недостаток може да придонесе за појава на одредени кардиоваскуларни проблеми.
Недостатокот на витамин Д се поврзува со повисок крвен притисок и воспалителни процеси, додека недостигот на витамин Б12 и фолна киселина може да доведе до анемија и покачени вредности на хомоцистеин – фактор што се поврзува со зголемен кардиоваскуларен ризик. Недостатокот на витамин Б1, пак, во потешки случаи може да го ослаби срцевиот мускул.
Експертите советуваат лекарска консултација доколку се јават симптоми како постојан замор, отежнато дишење, палпитации, вртоглавица, неправилен срцев ритам или трнење на екстремитетите. Овие симптоми не мора да значат недостаток на витамини, но бараат медицинска проценка.
Кардиолозите нагласуваат дека витаминските додатоци не треба да се земаат на своја рака. Најдобро е прво да се направат лабораториски анализи, а суплементацијата да биде по препорака на лекар, бидејќи здравата исхрана и животниот стил остануваат најважната заштита за срцето.
