Според официјалните податоци од Гинисовата книга на рекорди, титулата за најниски маж на планетата сега ја носи Афшин Есмаил Гадерзадех, дваесетгодишник од рурална област во Иран. Тој е висок само 65,24 сантиметри, што го прави дури 7 сантиметри понизок од претходниот рекордер – Колумбиецот Едвард „Нинџа“ Хернандез.
Афшин е роден во мало, изолирано село, а неговиот живот никогаш не бил лесен. Поради екстремно нискиот раст и сериозни здравствени проблеми, не можел да посетува училиште, а тоа резултирало со потешкотии во писменоста. И покрај тоа, со гордост открива дека научил да го напише своето име, што за него претставува огромен личен успех.
Семејството на Афшин живее скромно и се соочува со финансиски тешкотии, особено кога станува збор за покривање на трошоците за лекови и медицински третмани. Неговиот татко објаснува дека поради лековите и слабата физичка состојба, синот морал да го прекине школувањето. Дополнително, поради неговата големина, Афшин не може да најде соодветна работа, ниту пак да помогне во градежништвото – професијата на неговиот татко.
Секојдневието му е едноставно – гледа цртани филмови, користи интернет и поминува време со семејството. Иако умешно го користи мобилниот телефон, сепак има тешкотии дури и да го носи, поради неговата тежина во однос на неговото тело.
И покрај сите предизвици, Афшин е многу сакан и почитуван во неговата заедница, благодарение на неговата љубезност, насмевка и ведар дух. Тој отворено зборува дека сонува еден ден да живее како сите останати – да се движи сам, да има нормален живот, па дури и да вози автомобил.
Поради здравствените ограничувања и безбедносни ризици, Афшин никогаш не се движи сам – секогаш е во придружба на своите родители, а често и буквално го носат во раце низ селото.
