Едно од најпознатите туристички летувалишта во Европа, Сардинија, воведува строги правила со цел заштита на природната средина, а нивното прекршување може да резултира со високи парични казни.
Една од најпознатите забрани се однесува на однесување песок, школки или камчиња од плажите. Според локалните прописи, дури и мали количини се сметаат за прекршок, а казните можат да достигнат до неколку илјади евра.
Властите редовно спроведуваат контроли на пристаништата и аеродромите, каде се проверува багажот на туристите. Во случаи кога се пронаоѓаат вакви предмети, следуваат парични казни кои може да достигнат и до 3.000 евра.
Овие мерки се воведени како одговор на долгорочниот проблем со ерозија на плажите, предизвикан и од масовниот туризам. Во текот на годините се регистрирани големи количини песок и школки кои туристи се обиделе да ги изнесат како сувенири.
Дополнително, на одредени заштитени плажи важат и посебни правила за однесување, како забрана за користење класични пешкири кои задржуваат песок. Наместо тоа, се препорачуваат специјални подлоги кои не придонесуваат за губење на песокот.
Строги правила важат и за пушење, кампување и движење со возила на плажите, а прекршувањата се казнуваат со различни износи, зависно од тежината на прекршокот.
Локалните власти истакнуваат дека и најмалите количини земени од плажите имаат влијание врз природниот баланс, па затоа мерките се сметаат за неопходни за заштита на островот.
