Многумина се обидуваат да се ослободат од маснотиите на стомакот со специјални диети, стомачни вежби и различни „чудотворни“ методи. Сепак, науката покажува дека не постои начин телото да биде натерано да согорува масти исклучиво од еден конкретен дел.
Масното ткиво само по себе не е непријател на организмот. Тоа служи како резерва на енергија, помага во одржувањето на телесната температура и има заштитна функција. Проблем може да претставува прекумерното натрупување масти во пределот на стомакот, особено т.н. висцерална маст, која се таложи околу внатрешните органи.
Овој вид масти се поврзува со зголемен ризик од метаболички и други здравствени проблеми.
Може ли да се слабее само во стомакот?
Краткиот одговор е – не.
Телото само одредува од кои делови најпрво ќе ги користи масните резерви. Распределбата на мастите во голема мера зависи од генетиката, полот, хормоните и индивидуалните карактеристики на организмот.
Токму затоа кај некои луѓе промената најпрво се забележува на лицето или нозете, додека кај други стомакот почнува да се намалува порано.
Истражувањата покажуваат дека генетиката има значајна улога во распределбата на телесните масти, а идентификувани се стотици генетски варијации поврзани со обемот на струкот и колковите.
Што навистина функционира?
За намалување на маснотиите на стомакот потребно е намалување на вкупното количество телесни масти.
Тоа најчесто се постигнува преку комбинација од балансирана исхрана, редовна физичка активност и долгорочни промени во животниот стил.
Кога телото губи масти, тие постепено се намалуваат и од пределот на стомакот. Колку брзо тоа ќе стане видливо зависи од индивидуалната распределба на масното ткиво.
Токму затоа рекламите за производи, диети или петминутни тренинзи кои ветуваат дека ќе ги „стопат“ исклучиво мастите на стомакот треба да се земат со голема резерва.
Нема магично решение за рамен стомак. Најсигурниот пристап останува постепено и одржливо намалување на вкупните телесни масти преку исхрана, движење и здрави животни навики.
