Бруклин Бекам повторно се најде во центарот на јавноста, но овојпат не поради нов проект, туку поради жестоките реакции од фановите кои го обвинија за привилегираност и неблагодарност. По неговата објава на социјалните мрежи, во која јавно се дистанцираше од семејството и порача дека не сака помирување, интернетот буквално експлодира.
Во долгата изјава, Бруклин тврдеше дека со години бил контролиран од семејство кое, според него, повеќе се грижело за јавниот имиџ отколку за неговата среќа. Тој наведе дека вистински мир нашол дури откако започнал врска со сопругата Никола Пелц, откривајќи дека се борел со силна анксиозност.
Но, фановите не беа на негова страна. Напротив – многумина потсетија дека Викторија и Дејвид Бекам му стоеле зад секој негов обид да се пронајде професионално: од моделинг, преку готвење, до контроверзниот обид како фотограф на диви животни. Коментарите беа брутални – „Без нивното име и пари, немаше да стигне никаде“, „Обичен човек со толку промашени кариери одамна ќе работеше во супермаркет“, гласеа дел од реакциите.
Дополнителен оган долеа и тврдењето на Бруклин дека Викторија ја саботирала венчаницата на Никола и го расипала нивниот прв танц, што довело до обновување на заветите без присуство на семејството.
Додека тој зборува за слобода и мир, јавноста сè погласно прашува: дали навистина станува збор за жртва – или за уште еден пример на живот со златна лажица?
