На 9 февруари ширум светот се слави Светскиот ден на пицата – јадење што речиси и да нема човек кој не го обожава. Но, иако најчесто ја поврзуваме со Италија, приказната за пицата започнува многу порано и надвор од неа.
Уште во античка Грција се подготвувале рамни лепчиња од брашно и вода, печени на врел камен и зачинети со маслиново масло и билки. Овие едноставни погачи се сметаат за предци на денешната пица. Вистинската трансформација се случила дури по откривањето на Америка, кога доматот пристигнал во Европа и постепено станал клучна состојка.
Во 18 век, пицата станала омилена храна на народот во Наполи, каде што почнала да се продава на улица. Само еден век подоцна се отвора и првата пицерија, а градот засекогаш останува заштитен знак на традиционалната подготовка.
Интересно е што зборот „пица“ води потекло од старите изрази „picea“ и „piza“, со кои во јужна Италија се означувале различни видови погачи.
Денес, од класична маргарита до креативни комбинации со најразлични додатоци, пицата е глобален феномен. Светскиот ден на пицата не е само прослава на вкусот, туку и потсетник дека едноставното јадење може да стане светска гастрономска икона.
