Во петок, на 21 ноември, православните верници го празнуваат празникот на свети архангел Михаил, познат како војвода на сите ангели.
Главниот празник на свети архангел Михаил традиционално се празнува на 8 ноември според јулијанскиот календар и се нарекува Собор на свети архангел Михаил. Денешниот празник, пак, е посветен на неговите чуда во местото Хони, близу Ерапол во Фригија, каде што подоцна била подигната црква во негова чест.
Меѓу народот, празникот се нарекува Аранѓеловден, Оранѓеловден или едноставно Аранѓел. Црквата го определила овој ден за празник во чест на сите ангели, особено на архангел Михаил, кој се смета за водач на небесните сили.
На овој ден именден празнуваат: Ангел, Ангелина, Михаил, Мила, Милка, Михаила, Михо, Рајко, Рајна, Ратка и други.
Зошто архангел Михаил е претставен како војвода? Според верувањата, на почетокот сите ангели биле добри, но дел од нив се одметнале и почнале да прават злодела, станувајќи ѓаволи. Архангел Михаил ги победи овие лоши ангели и ги симна од небото, продолжувајќи да се бори за славата Божја. Поради тоа, на иконите и фреските е насликан во војводска облека, со меч и копје во рацете, како водач на сите ангели.
Во спомен на тој собир на ангели и нивната верност кон Бога, црквата го востановила празникот Собор на свети архангел Михаил. Овој ден е посветен на сите ангели, кои според верувањата се безбројни и се Господови гласници.
Според некои истражувачи, месецот ноември е одбран поради тоа што во поранешното сметање на годината, кога таа започнувала од март, ноември бил деветти месец – а девет е бројот на ангелските чинови. Осмиот ден (според стариот календар) е поврзан со доаѓањето на Христос за суд на живите и мртвите.
