Нутриционистите кои ги анализирале јаткастите плодови се согласуваат околу едно – бадемите се најздравата опција што може да се најде на трпезата.
Според нив, бадемите издвојуваат поради совршениот баланс на хранливи материи, нивната практичност и широката примена во секојдневната исхрана.
„Кога ќе се земе предвид хранливата вредност, прилагодливоста и можностите за употреба, тоа би биле бадемите“, истакнува една од нутриционистките Џанел Бобер. Слично мислење дели и нејзината колешка Мара Бароус, која нагласува дека бадемите се нејзин омилен избор поради бројните здравствени придобивки.
Зошто токму бадемите?
Експертите посочуваат дека бадемите се вистинска нутритивна „бомба“. Тие се богат извор на растителни протеини, влакна и здрави масти, кои заедно придонесуваат за подобро здравје и подолготрајно чувство на ситост.
Во една порција од 28 грама се наоѓаат околу 6 грама протеини, што е повеќе од многу други јаткасти плодови како индиски ореви или ореви.
Покрај тоа, бадемите позитивно влијаат на дигестивниот систем, бидејќи содржат влакна кои го поттикнуваат варењето и го поддржуваат здравјето на цревната флора.
Истражувањата покажуваат дека редовната консумација може да придонесе за намален ризик од срцеви заболувања, благодарение на високото присуство на незаситени масти и витамин Е, кој ги штити клетките од оксидативен стрес.
Бадемите се и одличен извор на магнезиум – минерал важен за регулирање на крвниот притисок и шеќерот во крвта.
„Комбинацијата од масти, влакна и протеини помага да се чувствувате сити подолго време“, објаснува спортскиот диететичар Роксана Ехсани.
Хранлива вредност
Во 28 грама бадеми има околу 164 калории, 14,1 грама масти, 6,1 грама јаглехидрати, 3,5 грама влакна и 6 грама протеини. Истата количина обезбедува и значителен дел од дневните потреби за витамин Е и магнезиум.
Како да се консумираат?
Нутриционистите препорачуваат бадемите да се вклучат во секојдневната исхрана на повеќе начини – како додаток во јогурт, овесни каши, салати, смутија или како брза ужина. Одлично се комбинираат и со овошје, сирење или темно чоколадо.
