Срцевата слабост е состојба при која срцето не може доволно силно да ја пумпа крвта, што го лишува ткивото од кислород и го спречува отстранувањето на штетните материи. За разлика од срцевиот застој, срцевата слабост не значи дека срцето престанало да работи, туку дека неговата функција е преслаба. Навременото откривање е клучно, бидејќи, иако за срцевата слабост нема лек, со соодветно лекување можно е да се постигне ремисија.
Раните симптоми често се незабележливи и лесно се мешаат со други здравствени проблеми, а традиционалните методи за дијагноза се скапи, инвазивни и недостапни за многумина. Новото решение може да биде едноставен тест на плунка кој користи протеин наречен S100A7 како клучен показател за срцева слабост.
Истражувањата покажуваат дека нивото на S100A7 кај пациенти со акутна срцева слабост е речиси двојно повисоко отколку кај здрави лица. Со новиот тест на гласничка РНК (mRNA), оваа разлика може лесно да се открие во примерок на плунка.
Во студија спроведена на 30 пациенти со срцева слабост, тестот покажал усогласеност со стандардните медицински тестови во околу 81% од случаите. Во споредба со примероци од шест здрави доброволци, тестот идентификувал пациенти со срцева слабост со точност од 82%, додека стандардните тестови, базирани на истиот протеин, имале само 52% точност.
Овој тест може да биде значаен чекор кон персонализирана медицина, овозможувајќи на луѓето да ги откријат знаците и симптомите пред појавата на состојбата и лесно да го следат напредокот на болеста. Според Роксан Мучлер, дипломиран студент по синтетичка биологија на Технолошкиот универзитет Квинсленд во Австралија: „Оваа работа придонесува кон развој на персонализирана здравствена грижа и помага пациентите да добијат навремена грижа.“
