Драма во германскиот град Бохум: 12-годишно девојче со српско државјанство беше застрелано од полицајци во станот на својата мајка, која претходно го загубила старателството над детето. Девојчето е хоспитализирано во тешка, но стабилна состојба.
Инцидентот се случил ноќта меѓу неделата и понеделникот. Полицијата претходно трагала по девојчето откако исчезнало од дом во којшто било сместено. Поради тоа што тоа не бил првпат да го напушти домот, полицијата претпоставила дека можеби е кај мајката во Бохум и испратила патрола на адресата.
Полицајците повеќепати ѕвонеле и тропале на врата, но мајката и девојчето, двете глуви, не реагирале веднаш. По еден час, домар бил доведен за да ја отвори вратата. Откако мајката ја отклучила вратата, полицајците го забележале девојчето како трча низ ходникот кон собата.
Според официјалното соопштение на полицијата, девојчето имало ножеви во рацете и, наводно, нападнало полицајци. За одбрана, полицајците употребиле електрошокер и огнено оружје, при што девојчето било рането и веднаш пренесено во болница.
Германските медиуми додаваат дека девојчето е дијабетичар и зависно од инсулин, а исто така е и глуво, што дополнително го отежнило инцидентот. Девојчето било претходно пријавено за исчезнато, а мајката веќе ја изгубила старателството и правото да одлучува за местото на престој на детето.
Итната помош и лекарите веднаш пристигнале на местото и го пренеле девојчето на интензивна нега, додека истрагата ја презеде одделот за убиства на полицијата од Есен под надзор на јавниот обвинител од Бохум.
Овој настан ја потресе јавноста во Германија и ја отвори дебатата за безбедноста на полицијата, заштитата на децата и процедурите при интервенции во домови со малолетни лица со посебни потреби.
