Авиосообраќајот во Обединетите Арапски Емирати повторно се враќа во нормала – Дубаи ги укина сите ограничувања за летови воведени по почетокот на војната меѓу САД и Израел против Иран.
Извршниот директор на аеродромите во Дубаи, Пол Грифитс, изјави дека операциите постепено се зголемуваат и дека системот е во добра позиција да го поддржи растот на побарувачката. Според него, од крајот на февруари преку Меѓународниот аеродром во Дубаи и Дубаи Ворлд Централ безбедно биле опслужени над шест милиони патници, повеќе од 32.000 летови и над 213.000 тони критичен товар.
Потсетување: по избувнувањето на конфликтот, Иран одговори со напади врз цивилна инфраструктура низ Персискиот Залив – аеродроми, енергетски објекти и пристаништа. Емиратите, кои во 2020 година ги нормализираа односите со Израел, беа меѓу најтешко погодените од ракетни и дрон напади.
Сега, со укинувањето на ограничувањата, Дубаи се позиционира како клучен регионален центар за патнички и товарен сообраќај, подготвен да ја поддржи глобалната авиоиндустрија во период на прилагодување.
