Наглото излегување од климатизирана просторија на температури повисоки од 35 степени може да претставува сериозен стрес за организмот. Телото мора за кратко време да се приспособи на големата температурна разлика, што кај некои луѓе може да предизвика вртоглавица, слабост, забрзано чукање на срцето и пад на крвниот притисок.
Според лекарите, клима уредот не треба да биде поставен на премногу ниска температура. Најдобро е разликата меѓу надворешната и внатрешната температура да биде околу шест до осум степени, бидејќи така организмот полесно се приспособува при излегување надвор.
За да се намали ризикот од топлински стрес, се препорачува пред излегување неколку минути да се поминат во простор кој не е климатизиран, како ходник или тераса, а добро е и да се испие чаша вода.
Експертите нагласуваат дека клима уредот сам по себе не предизвикува настинка, бидејќи таа е резултат на вирусни инфекции. Сепак, ладниот и сув воздух може да ги исуши носната и грлената слузница, поради што тие стануваат почувствителни и се јавува чувство на непријатност.
Дополнително, важно е редовно да се проветруваат просториите и да се одржуваат клима уредите. Нечистите филтри можат да собираат прашина и микроорганизми, па затоа редовното чистење и сервисирање е неопходно, особено кај централните системи за ладење.
За попријатен и побезбеден престој во текот на летото, стручњаците советуваат климата да не дува директно кон телото и температурата во просторијата да не биде драстично пониска од онаа надвор.
