Лукот со години се смета за една од најздравите намирници, а сè повеќе истражувања укажуваат дека може да има позитивно влијание и врз здравјето на црниот дроб. Сепак, експертите нагласуваат дека не станува збор за лек, туку за дел од здрав и избалансиран начин на исхрана.
Според диететичарката Кетрин М. Патон од Клиниката во Кливленд, соединенијата што ги содржи лукот, како алицин и диалил-дисулфид, можат да помогнат во намалување на воспалението и оксидативниот стрес, како и да придонесат за спречување на натрупување масти во црниот дроб.
Најмногу научни докази засега постојат кај лицата со метаболички поврзана масна болест на црниот дроб (MASLD). Одредени истражувања покажуваат дека редовното консумирање лук или препарати на негова основа може да придонесе за намалување на ензимите на црниот дроб и на масните наслаги кај овие пациенти.
Експертите посочуваат дека суровиот лук содржи најмногу алицин, особено кога е ситно исечкан или згмечен, а првите позитивни ефекти најчесто се забележуваат по околу 12 недели редовна консумација.
Сепак, лукот не е погоден за сите. Кај некои луѓе може да предизвика горушица, надуеност или други дигестивни тегоби, особено ако се јаде суров. Дополнително, лицата кои користат лекови за разредување на крвта треба претходно да се консултираат со лекар пред да внесуваат поголеми количини лук.
Според нутриционистите, најдобри резултати за здравјето на црниот дроб се постигнуваат со здрава исхрана, редовна физичка активност, одржување на нормална телесна тежина и ограничување на алкохолот, додека лукот може да биде корисен како дополнителен дел од таквиот начин на живот, но не и како замена за медицински третман.
