На интернет масовно се споделува видео кое прикажува како човечкото тело реагира кога 24 часа не внесува храна. Многумина мислат дека промените се случуваат дури подоцна, но според експертите, организмот почнува да се прилагодува многу порано.
Постењето е дел од религиозната практика на муслиманите за време на Рамазан, кога од зори до зајдисонце се воздржуваат од храна и пијалак. Но во последните години 24-часовниот пост станува популарен и како здравствен тренд, особено преку таканаречениот повремен пост, кој некои го практикуваат за слабеење или подобрување на метаболизмот.
Сепак, лекарите предупредуваат дека ваквиот режим не е погоден за секого и дека ефектите зависат од општата исхрана и начинот на живот.
Што се случува во телото?
Во првите четири часа телото сè уште ја вари храната. Нивото на инсулин почнува да се намалува, а организмот постепено почнува да ги користи резервите на шеќер како извор на енергија.
По околу осум часа, шеќерот во крвта дополнително опаѓа и телото почнува да го троши гликогенот складиран во црниот дроб и мускулите.
По 12 часа започнува блага кетоза – состојба во која организмот почнува да ги претвора мастите во енергија. Кај некои луѓе ова може да доведе до намален апетит, но и чувство на замор.
По 16 часа се активира процес познат како автофагија, при што телото почнува да ги „чисти“ оштетените клетки и да ги рециклира нивните делови.
Кога ќе поминат 24 часа без храна, мастите стануваат главен извор на енергија, а некои истражувања покажуваат дека може да се намали воспалението и да се подобри чувствителноста на инсулин. Сепак, експертите советуваат ваквиот режим да се практикува внимателно и по консултација со стручно лице.
