Голема трагедија ја потресе јавноста откако во гаража од семејна куќа во Лакташи биле пронајдени безживотните тела на 51-годишниот Ненад Рачиќ и неговиот 28-годишен син Љубиша Рачиќ.
Според првичните неофицијални информации, се претпоставува дека таткото најпрво пукал во својот син, а потоа си го одзел животот. До телата бил пронајден и пиштол, што дополнително ја насочува истрагата кон можноста за убиство и самоубиство.
Трагедијата била пријавена на 10 март околу пладне во полициската станица во Лакташи. На местото на настанот излегле полициски службеници и дежурен обвинител од Окружното јавно обвинителство во Бања Лука, кои извршиле увид во гаражата на семејната куќа во населбата Шушњари.
По наредба на обвинителството, телата се испратени на обдукција во Заводот за судска медицина на Република Српска со цел да се утврдат точните причини и времето на смртта. Истражителите земале и докази за понатамошни вештачења, вклучувајќи и парафински ракавици за анализа на барутни честички.
Во моментот на трагедијата, сопругата на Ненад и мајка на Љубиша не била дома, туку била на работа.
Жителите на населбата изјавиле дека пред настанот слушнале одредена бучава од гаражата, но никој не слушнал истрели. Според нив, во куќата во тоа време биле само таткото и синот.
Мотивот за трагедијата засега не е познат, но неофицијално се споменува дека меѓу нив претходно имало одредени несогласувања. Истрагата продолжува за да се утврдат сите детали околу овој шокантен случај.
