Домаќинствата во Европа се соочуваат со големи разлики кога станува збор за задолженоста, покажува најнова анализа на Евростат. Додека во некои држави кредитите се дел од секојдневното финансиско планирање, во други нивото на задолженост е значително пониско.
На врвот на листата се наоѓа Данска, каде што долгот на домаќинствата надминува 200 проценти од расположливиот доход. Високо рангирани се и Холандија, Луксембург, Шведска и Норвешка, земји во кои кредитите, особено станбените, се широко распространети.
Експертите објаснуваат дека високата задолженост не мора секогаш да значи финансиска нестабилност. Во многу од овие држави граѓаните имаат високи приходи, стабилен банкарски систем и голем дел од долговите се поврзани со купување недвижности.
Од друга страна, Романија, Бугарија и повеќе земји од Југоисточна Европа бележат значително пониско ниво на задолженост на домаќинствата. Причините најчесто се помалата достапност на кредити, пониските приходи и поголемата воздржаност на граѓаните кон задолжување.
Економистите посочуваат дека при оценување на финансиската состојба на едно домаќинство не треба да се гледа само висината на долгот, туку и приходите, вредноста на имотот и способноста кредитите редовно да се отплаќаат.
Анализата покажува дека европските земји имаат различни модели на финансирање, а нивото на задолженост често зависи од условите за кредитирање, цените на недвижностите и економската политика во секоја држава.
