Пазарот на фосили од диносауруси бележи невиден раст, а сè повеќе милијардери и богати колекционери ги сметаат за една од највредните алтернативни инвестиции.
Најнов доказ за овој тренд е аукцијата во Њујорк, каде скелетот на Тираносаурус рекс, познат како „Гас“, беше продаден за рекордни 50,1 милиони долари. По кратко наддавање, анонимен купувач ја плати највисоката цена досега за еден фосил.
„Гас“ е стар околу 67 милиони години, долг повеќе од 11 метри и сочинува околу 61 процент од оригиналниот скелет, што го прави еден од најдобро зачуваните примероци што некогаш се појавиле на аукција. Фосилот бил пронајден на приватен ранч во американската држава Јужна Дакота, а ископувањата траеле две години.
Според аналитичарите, богатите инвеститори сè почесто вложуваат во вакви ретки предмети, покрај уметнички дела, луксузни часовници, класични автомобили и скапи вина, очекувајќи нивната вредност дополнително да расте.
Сепак, рекордните продажби предизвикуваат загриженост кај научниците. Палеонтолозите предупредуваат дека многу вредни фосили завршуваат во приватни колекции, со што стануваат недостапни за научни истражувања и за пошироката јавност. Затоа тие апелираат новите сопственици да овозможат пристап до овие уникатни откритија и тие да бидат изложени пред јавноста.
