Цените на нафтата денеска забележаа нагло зголемување, достигнувајќи нивоа какви што не биле регистрирани со месеци. Причина за ваквиот скок е зголемената неизвесност на светската сцена и стравувањата дека снабдувањето со енергенси би можело да биде доведено во прашање.
Нафтата од типот Брент се искачи над 65 долари за барел, додека американската WTI ја надмина границата од 61 долар, покажуваат податоците од берзанските движења. Пазарите реагираат чувствително на сигналите за можна ескалација на тензии, што дополнително ја зголемува нервозата кај инвеститорите.
Изјавите и потезите од Вашингтон во врска со Блискиот Исток внесоа дополнителна претпазливост, а неизвесноста околу дипломатските односи ја засили перцепцијата за ризик. Пазарите стравуваат дека секое ново заострување може директно да се одрази врз стабилноста на енергетските текови.
Дополнителен притисок доаѓа и од Централна Азија, каде проблеми со инфраструктурата, временски услови и безбедносни инциденти значително го намалија извозниот капацитет. Овие нарушувања создадоа нов бран шпекулации и ја турнаа цената на „црното злато“ нагоре.
Аналитичарите предупредуваат дека доколку неизвесноста продолжи, нестабилноста на пазарот може да трае и во наредниот период.
