Рекордна количина фалсификувани производи е запленета низ Европската Унија, а нивната вкупна проценета вредност достигнува неверојатни 6,3 милијарди евра. Најновите податоци откриваат дека во текот на 2025 година европските власти откриле и задржале повеќе од 196 милиони фалсификувани производи, што претставува најголема забележана количина досега.
Според годишниот извештај на Канцеларијата на Европската Унија за интелектуална сопственост (EUIPO), бројот на запленети производи е зголемен за дури 67 проценти во споредба со претходната година.
Рекордна е и нивната проценета пазарна вредност. Додека во 2024 година биле запленети фалсификувани производи во вредност од околу 3,9 милијарди евра, во 2025 година таа сума се искачила на 6,3 милијарди евра.
Откриено од каде пристигнува најголемиот дел од фалсификуваната стока
Најголемиот дел од запленетите фалсификувани производи потекнуваат од Кина, со учество од над 40 проценти, додека на второто место е Турција со 18 проценти.
Меѓу најчесто запленуваните производи се ЦД-а и ДВД-а, компјутерски софтвер, играчки, етикети, налепници, цигари и облека.
Големите количини фалсификувана стока биле откривани при контроли на надворешните граници на Европската Унија, но и на внатрешниот пазар.
Според европските институции, зголемениот број заплени може да се поврзе со поинтензивните активности против криминалните групи кои се занимаваат со фалсификување производи, како и со подобрените царински и полициски контроли.
Сепак, властите се соочуваат со сериозни предизвици во откривањето на нелегалната трговија.
Интернет-продажбата дополнително ја отежнува контролата
Еден од најголемите проблеми е растот на онлајн трговијата, преку која фалсификуваните производи сè полесно стигнуваат до купувачите.
Голем број пратки се испорачуваат преку поштенски служби и приватни компании за достава, што значително го отежнува нивното откривање.
Дополнителен предизвик претставуваат различните транспортни рути и ограничените капацитети на институциите задолжени за контрола на нелегалната трговија.
Од EUIPO предупредуваат дека за поефикасна борба против фалсификуваните производи е неопходна подобра меѓународна соработка, примена на современи технологии и дополнително зајакнување на механизмите за заштита на интелектуалната сопственост.
Иако рекордните заплени покажуваат засилена активност на институциите, тие не откриваат колкави количини фалсификувани производи сепак успеваат да стигнат до европските потрошувачи.
