Необичен случај ја привлече светската јавност откако новинарска истрага откри дека снимка од наводно апсење на романски државјанин, објавена од руската Федерална служба за безбедност (ФСБ), всушност била направена неколку месеци откако тој веќе бил приведен.
Станува збор за 23-годишниот Давид Адријан Керчо, романски државјанин кој пораснал во Англија и кој во Русија е осуден на 15 години затвор поради обвинение за шпионажа во корист на Украина.
Според истражувањето на Ројтерс, снимката што руските власти ја претставиле како момент на неговото апсење била направена додека младиот човек веќе со месеци се наоѓал во руски притвор.
Го собориле на земја пред камера, но веќе бил во притвор
На видеото се гледа млад маж со сина капа и ранец како оди низ парк во рускиот град Сочи.
Во еден момент, од комбе излегуваат двајца припадници на безбедносните служби, кои го соборуваат на земја и го приведуваат.
Додека лежи на земјата, му поставуваат прашања на англиски јазик за неговиот идентитет и потекло.
Тој одговара дека се вика Давид Адријан Керчо и дека доаѓа од Романија.
Но, анализата на Ројтерс открила сериозни несогласувања меѓу прикажаниот настан и официјалните судски документи.
Имено, во моментот кога била снимена сцената, Керчо веќе четири месеци бил во притвор и најмалку десет пати се појавил пред руски суд.
Новинарите ја утврдиле и точната локација на снимањето, споредувајќи ги деталите од паркот со архивски и сателитски снимки.
Го разбудиле во затвор во зори и го однеле да снима апсење
Во писма испратени до своето семејство, Керчо тврди дека руските агенти го разбудиле во раните утрински часови и го однеле на локација во Сочи.
Таму, според неговото сведоштво, бил принуден да учествува во снимање на сцена која подоцна била претставена како негово вистинско апсење.
Ројтерс утврдил дека временските и географските карактеристики на снимката се во согласност со неговото сведоштво.
Рускиот адвокат Евгениј Смирнов, кој е запознаен со случајот, тврди дека ваквите инсценирани апсења не се непозната практика.
Според него, постојат случаи во кои осомничени лица биле изведувани од притвор и носени на улици, во шуми или на железнички станици за да бидат снимени драматични сцени на приведување.
Љубовна приказна што завршила со 15 години затвор
Случајот станува уште понеобичен поради околностите под кои младиот Романец отпатувал во регионот.
Кон крајот на 2023 година, додека живеел во англискиот град Рединг и работел во компанија за рециклирање електронска опрема, Керчо преку интернет запознал жена која се претставила како Валерија од Абхазија.
Меѓу нив започнала онлајн љубовна врска, а во август 2024 година тој отпатувал преку Турција за да се сретне со неа.
Според семејството, најпрво се сретнале во Сочи, по што заминале во Абхазија, сепаратистички регион на Грузија.
Неговата мајка Јулија го предупредувала дека патувањето е опасно.
„Му реков да не оди таму, бидејќи е многу опасно, бидејќи има војна. Но, никогаш не ме послуша“, изјавила таа за Ројтерс.
Со текот на времето односот со девојката се влошил, а Керчо одлучил да се врати дома.
Повратниот пат бил планиран за 28 ноември 2024 година, но тој никогаш не пристигнал.
Токму тој ден престанал да одговара на повиците и пораките од своето семејство.
Тврди дека бил принуден да признае шпионажа
Неколку недели подоцна, проруските сепаратистички власти во Абхазија објавиле снимка на која Керчо признава дека бил во контакт со украинските разузнавачки служби.
Според руските власти, тој доставувал информации за локациите на руски системи за противвоздушна одбрана во Сочи.
Меѓутоа, Керчо во писмата до своето семејство тврди дека признанијата биле изнудени.
Тој наведува дека бил принуден да научи однапред подготвен текст и да го изговори пред камера, со ветување дека потоа ќе биде ослободен.
„Ништо од тоа не се случи. Ми го украдоа животот без причина и измислија сè“, напишал тој.
Керчо тврди и дека бил тепан, држен во изолација и измачуван, но Ројтерс нагласува дека не можел независно да ги потврди овие наводи.
Руската ФСБ не одговорила на новинарските прашања, вклучително и на барањето да објасни зошто објавила снимка од наводно апсење на лице кое веќе било во притвор.
„Бев заслепен од љубовта“
Младиот Романец во меѓувреме е осуден на 15 години затвор, а неговото семејство се надева дека ќе може да поднесе жалба на пресудата.
Тој во затвор научил руски јазик, а во писмата постојано изразува желба повторно да го види своето семејство.
Осврнувајќи се на одлуката да отпатува во Абхазија, Керчо признал дека направил огромна грешка.
„Сега знам дека доаѓањето овде беше огромна грешка. Бев заслепен од љубовта и не ги видов предупредувачките знаци“, напишал тој.
