Дваесет и седумгодишен државјанин на Србија е осомничен дека од затворска ќелија во Австрија организирал трговија со кокаин, координирајќи ги своите соучесници и договарајќи испораки на дрога во Виена.
Според австриските медиуми, осомничениот ја водел мрежата од поправниот дом Хиртенберг во Долна Австрија, каде што издржувал затворска казна.
Тој наводно го користел псевдонимот „Ралф Лорен“, а комуникацијата со соработниците ја одржувал преку апликацијата „Сигнал“.
Истражителите се сомневаат дека договорил продажба на пет килограми кокаин во вредност од 95.000 евра.
Полицијата ја открила мрежата откако таен агент се претставил како купувач и договорил набавка на еден килограм дрога за 18.500 евра.
По извршената трансакција следувале апсења, а при претрес на стан биле пронајдени дополнителни количества наркотици, пари и фалсификувани документи.
Во акцијата биле приведени и двајца осомничени соучесници, на возраст од 24 и 32 години.
Особено необична ситуација се случила при претресот на затворската ќелија на наводниот организатор.
Полицајците го затекнале со рака заглавена во тоалетот, откако безуспешно се обидел да го уништи мобилниот телефон и да го фрли во одводот.
Поради повреда на раката му била укажана медицинска помош, а потоа бил префрлен во затворот Јозефштат.
Осомничениот и неговите наводни соучесници се соочуваат со постапка за тешка трговија со дрога пред надлежниот суд во Виена.
Доколку вината им биде докажана, им се закануваат долгогодишни затворски казни. До правосилна пресуда важи презумпцијата на невиност.
