Организирани криминални групи во регионот сè почесто регрутираат млади лица од Македонија за извршување тешки кривични дела во Србија, меѓу кои вооружени напади и поставување експлозивни направи, објавува српски „Блиц“.
Според информациите што ги пренесува медиумот, најмалку 16 млади лица од Македонија во последните години биле поврзани со криминални структури во Србија, а меѓу нив имало и малолетници.
Регрутацијата наводно започнува со ветувања за голема заработка, брзи пари и напредување во криминалната хиерархија.
Поранешниот оперативец на Државната безбедност, Божидар Спасиќ, тврди дека лица поврзани со криминалните организации доаѓаат во Македонија, посетуваат кафулиња и бараат млади кои би можеле да ги ангажираат за одредени задачи.
Според него, дел од кандидатите биле избирани и по препорака на криминални босови.
Особено загрижува фактот што меѓу регрутираните има малолетници, лица без претходно криминално искуство, но и млади со проблеми поврзани со дрога и коцкање.
Професорката Драгана Батиќ предупредува дека децата без родителска грижа, младите од улица и оние од дисфункционални семејства можат да бидат особено ранливи на криминално врбување.
Според објавените информации, регрутацијата се засилила во 2024 година, а по пристигнувањето во Србија, младите добивале инструкции преку затворени комуникациски канали.
На некои, наводно, им биле одземани и личните документи, што дополнително им го отежнувало напуштањето на криминалните групи.
Безбедносните експерти предупредуваат дека ваквите мрежи би можеле дополнително да се прошират, вклучително и кон трговијата со наркотици, доколку не се спречи регрутацијата на млади лица.
