Еден тинејџер го загубил животот, а три лица се повредени во вооружена пукотница што се случила по церемонија на матура во средно училиште во градот Ферфилд, северно од Сан Франциско.
Полицијата реагирала околу 19:15 часот по локално време, по дојава за истрели испукани на училишниот паркинг, каде во тој момент се наоѓале голем број ученици, родители и гости кои присуствувале на свеченоста.
Меѓу повредените се и едно 11-годишно дете, како и двајца млади мажи на возраст од 20 и 25 години. Сите биле итно пренесени во болница, додека засега не се објавени дополнителни информации за нивната состојба.
Според податоците од училишната област Ферфилд-Суисун, инцидентот се случил по завршувањето на церемонијата на дипломирање во средното училиште „Сем Јето“, кое се наоѓа во рамки на заеднички кампус со средното училиште „Ферфилд“.
Очевидци опишуваат дека веднаш по истрелите настанала паника, а присутните почнале да бегаат во сите правци, додека просторот кој претходно бил исполнет со славеничка атмосфера се претворил во сцена на хаос.
Полицијата соопшти дека истрагата е во тек и дека засега нема објавени детали за можен осомничен, но исто така наведува дека нема индикации за непосредна закана за пошироката заедница.
