Најмалку 12 лица го загубија животот во катастрофалниот шумски пожар што го зафати подрачјето околу градот Лос Галардос во југоисточната шпанска покраина Алмерија, соопштија властите од Андалузија. Во пожарот се повредени и најмалку шест лица, додека стотици пожарникари и спасувачи водат битка со огнената стихија.
Според првичните информации, дел од жртвите биле пронајдени во автомобили кои биле целосно зафатени од пламенот. Очевидци тврдат дека пожарот избувнал откако паднал далекувод, по што огнот со огромна брзина се проширил кон блиската шумска област. Сепак, надлежните институции засега не ја потврдиле официјално причината за избувнувањето на пожарот, а истрагата е во тек.
Разорниот пожар доаѓа во период кога јужна Европа е погодена од екстремен топлотен бран, со температури кои на многу места достигнуваат и над 40 степени Целзиусови. Ваквите временски услови значително го зголемуваат ризикот од избувнување и брзо ширење на шумските пожари.
Регионалната влада на Андалузија соопшти дека бројот на загинати се искачил на 12 откако биле потврдени уште шест смртни случаи. Претседателот на Андалузија, Хуанма Морено, трагедијата ја опиша како „страшна несреќа“, изразувајќи сочувство до семејствата на загинатите.
Во меѓувреме, околу 150 пожарникари се ангажирани во гаснењето на пожарот, особено во близина на селото Бедар, каде огнот предизвика голема материјална штета и сериозна опасност за локалното население.
Меѓу повредените има лице кое било хоспитализирано поради вдишување густ чад, како и едно лице со изгореници. Дополнително, уште четири лица добиле медицинска помош на самото место поради полесни изгореници и проблеми со дишењето.
Поради опасноста од ширење на огнот, затворени се повеќе патни правци, а околу 1.000 жители биле принудени итно да ги напуштат своите домови. Во акцијата за справување со пожарот се вклучува и шпанската Воена единица за вонредни ситуации (UME), која интервенира при најголемите природни катастрофи во земјата.
Шпанскиот премиер Педро Санчез претходно најави дека ова лето земјата ќе располага со најголем капацитет за гаснење пожари во својата историја, токму поради зголемениот ризик од екстремни временски услови.
Податоците покажуваат дека Шпанија годинава бележи рекордно високи температури, а во одредени региони се очекува живата во термометарот да достигне и до 42 степени Целзиусови. Според Европскиот информативен систем за шумски пожари (EFFIS), минатата година во Шпанија изгореле околу 393.000 хектари земјиште, што е повеќекратно над просекот во последните две децении.
Експертите предупредуваат дека климатските промени придонесуваат за сè почести, поинтензивни и потешко контролирани шумски пожари низ Европа. Според научните анализи, континентот се затоплува побрзо од глобалниот просек, а екстремните горештини, долгите сушни периоди и силните ветрови создаваат услови за катастрофални пожари кои стануваат сè почеста појава.
